P01 la storie

In principi il patriarcje al veve nome il podêi spirituâl su pa diocesi di Aquilee.

Il titul di patriarcje al ere stât dât dal pape, parcè che sot da diocesi di Aquilee al ere denti un teritori un grum grant, dulà che al vescul di Aquilee i ubidivin parochies, pleifs, âtes diocesi e sichè encje âtis vescui.

Cu la muart di Carli il Grant (814), il so imperi al è stât dividût in trêi parts. Ma, dopo, i vassâi an vût simpri plui autonomie, fint a gjavâ dute la fuarce al podêi centrâl.

Dal X secul, la part plui orientâl a ere guviernade da famee dai Otons, dal cjasât di Sassonie.

La persone plui impuartant di cheste famee al è stât Oton I, che, dopo jessisi fat incoronâ imperadôr dal pape (962), al à tornât a meti in pîts l’Imperi.

Ma il rapuart tra l’imperadôr e il pape al lave di mâl in pieis, parcè che a ’nd ere un grum di barufes par cui che di lôr doi al veve da dâ las inviestidures

A dispiet di chest, i patriarcjes a erin restâts fedêi al imperadôr e par chest a son stâts ripaiâts.

Volfanc (1019-1042), clamât Popon, al à vût noves donazions e il podêi di bati monede, al à progjetât la rinascince di Aquilee e al à pocât par tornâ a meti adum strades, cjascjei e mercjâts. In plui, par dâi un poc al cumierç al a spindût un grum di bêçs par regonâ las strades dal Friûl.

Cuant che Indrì IV, ch’al veve cavilât cul pape, al è stât scomunicât e ch’al veve cuintri tancj dai siei vassâi, il patriarcje Sigjeart al è stât tant fedêl che al à vût in gambio l’inviestidure feudâl su pa contee dal Friûl.

Cussì, ai 3 di avrîl dal 1077, al è nasciût il Stât patriarcjâl e fintramai al dì di voi in chê dì si fâs fieste in onôr da Patrie dal Friûl.

Ta prime ete dal stât patriarcjâl, i patriarcjes a son stâts par plui nobii todescs, ch’a an vût une part un grum impuartant intas lotes tra l’imperadôr e il pape.

Lôr a son stâts fedêi ai imperadôrs, tant che Pelegrin al è deventât conseîr personâl di Fedrì Barberosse e al si è metût cun lui tas lotes cuintre dai Comuns talians.

In gambi di cheste fedeltât, i patriarcjes a an vût simpri plui cjeres e simpri plui autonomie.

Sul finî dal XI secul, il stât patriarcjâl al ere il plui grant e il plui unît di dute l’Italie setentrionâl.

Il stât al à vût la sô mascime grandece cuant che l’imperadôr todesc i à dât l’Istrie e il Cragn al patriarcje Volchero, ch’al ere encje il puartevôs dal imperadôr in Italie.

Plui tart, chel ch’al è vignût dopo di lui, Bertolt di Andechs, fradi da reine di Ongjarie, al à scuignût parâsi da une ribelion pocade indavant da cualchi sioron furlan; chescj a volevin plui autonomie e a son lâts in convigne cun Gurisse, Trevîs e il Cragn cuintre dal stât patriarcjâl.

A dispiet di chest, il patriarcje, dopo jessi lât in convigne cun Vigneisie, cul pape e cul imperadôr, al à batût i siei nemîs. A chel pont, stant che chei ch’a erin cuintre di lui a erin ghibelins, Beltram al è passât cui guelfs.

Intun prin moment a ’nd è stade une crise par vie che l’imperadôr e il pape a volevin jessi un parsore di chel âti.

Encje il patriarcje al è stât un grum indebolît da chestes continues barufes, cussì i siôrs a an inviât un grum di ribelions, fasint vegni une dificil situassion di disordin.

Il stât patriarcjâl al veve tancj nemîs, i plui pericolous a erin: il cont di Gurisse, il feut di Pordenon (ch’al ere di famees todescjes), la potent famee guelfe dai siôrs da Cjamin (ch’a erin stâts par un tic siôrs di Trevîs); ma il nemì plui pericolous di ducj a ere la Republiche di Vigneisie.

I patriarcjes Grivôr da Montelongo (1273-1296) e Raimont dalla Torre (1273-1299) a an dovût combati cuintre chescj nemîs cussì periculous, intun timp di lotes violentes e continues, soredut cuintre di Vigneisie par vêi l’Istrie.

Dopo di cheste ete di vueres, il pape al à nomenât patriarcje Beltram di Saint Geniès, ch’al à cerût di tornâ a vêi sot di se dut il teritori, di fâ lâ in miôr l’economie e di jessi simpri plui fuart dai nobii e dai nemîs forescj.

Chest patriarcje cjamât di volontât e di fuarce al à scombatût cuintre dai siôrs da Cjamin, al à rivât a cjapâ il Cjadovri e al à batût il cont di Gurisse.

Al à rivât adore di garantî la sigurece das strades, di infuartî las difeses dai pas, di punî i feudataris ch’a si erin comportâts malementi, di regolâ l’esercit e di tornâ a dâur vite ’a culture e al artesanât.

Dut chest, però, al à fat ombre ai nobii, ch’a si son dâts dongje cul cont di Gurisse e cun Cividât e a an copât il patriarcje (1350).

Il Friûl al è tornât cussì tal disorden, alore il pape al à fat patriarcje Nicolau di Lussimburc, fradi dal imperadôr Carli IV, ch’al à fate paâ a chei ch’a vevin copât Beltram e ch’al à sdrumât i lôr cjascjei.

Nicolau e il so sucessôr Luduì dalla Torre a an scombatût cuintre la famee dai Asburc, ch’a volevin controlâ il Friûl e cjapâ l’Istrie, ma a son stât batûts dal esercit dal patriarcje.

Sot dal patriarcje Marcuart di Randeck a ’nd è stade une ete di pâs e al è stât metût adum il codiç das leçs dal Friûl: las Costitutiones Patriae Foriiuli (1366).

La debolece da l’autoritât dal patriarcje e i contrascj ch’a metevin cuintre nobii e Comuns, a an puartât ’a fin dal stât patriarcjâl.

A ’nd è stades grandes lotes e chê tra Cividât e Udin a è stade une das plui disastroses.

Cividât al ere cul patriarcje, cun dibot ducj i Comuns furlans, cun Padue e il re d’Ongjarie; invesse Udin, paronade da famee dai Savorgnan, a si ere metude cun Vigneisie, ch’al ere il plui grant nemì dal stât patriarcjâl, parcè che a voleve slargjâ i siei possès.

Il patriarcje Zuan di Moravie, par gjavâur fuarce ai Savorgnan, al a dât simpri plui podêi al popul, ma, tal 1389, a è capitade une rivolte, dulà ch’al è stât copât propit Fidrì Savorgnan.

Chest al à fat nasci violentes barufes tra il patriarcje e la famee Savorgnan, che, par svindicâsi da muart di Fidrì, a an vût cûr di copâ il patriarcje (1394).

Ma la vuere ch’a à puartât a la ruine dal Friûl a è stade chê da Repubbliche di Vigneisie cuintre dai Asburc.

E indavûr las dôs citâts plui impuartants dal Friûl a si son metudes une cuintre di chê âte.

Intal 1412 al è stât nomenât patriarcje il puartevôs dal imperadôr in Friûl: Luduì di Teck, ch’al à rivât adore di vêi une pousse da lote par cinc agns.

Finide la pousse, Vigneisie a à invadût il Friûl e a à cjapât Cividât. Il patriarcje al à provât a parâ vie Vigneisie, ma nol à rivât. Cussì, ai 7 di jugn dal 1420, l’esercit venessian al à cjapât Udin, metint fin al stât patriarcjâl.