|
Nobiltât e cjascjei
| ||
|
IL FEUDALISIM IN CJARGNE
I feuts a erin propietâts che il re o il siôr al dave ai dipendents o vassâi, che in gambio a vevin di prometi di essi fedêi e ubidients.
L’imperadôr i à dât al patriarcje di Aquilee la contee dal Friûl e cussi chest al è deventât encje paron da Cjargne.
Il patriarcje al veve il podêi di concedi bens, il podêi juridic e il dovêi di parâ e di difindi la int da Cjargne.
Dongje dai terens dal patriarcje, in Cjargne a erint las Arimanies longobardes.
Il patriarcje al à dât in feut (ma chel ch’a lu riceveve al veve di dâi un tant) o al à vendût dal dut cetancj dai siei bens. Cussì ungrum di int, famees, ma encje ents di glesie (come monasteris), ch’a no erin cjargnei, a podevin vêi achì da roube. In Cjargne a si forme cussì un particolâr grup di int: i GJISMANS.
Sicome che in Cjargne a ’nd è dome monts, le tiere a rint pouc e a ’nd è poucje int, il patriarcje a nol tirave fûr trop da cheste zone: alore al à tacât a invistî a une singule persone, a titul feudâl par dute la vite, cualchidun dai siei terens, come prâts, cjases e mulins. Chescj vassâi a vevin il dovêi di zurâi al patriarcje fedeltât e di siervîlu in timp di vuere (dant un o plui soldâts a cjaval a seconti di trop ch’al ere grant il feut).
Chescj vassâi a stavin par impuartance intal mieç tra la nobiltât e i propietaris; a erint dibot ducj agricultôrs. No si sa inmò benon se i Gjismans ai ves ce fâ cu la vite politiche. A ’nd è documents ch’a disin che i Gjismans a erin intal Parlament de Patrie dal Friûl intai prins dal Tresinte; âtis a disin che i Gjismans a no erin intal Parlament, parcè che a no paavin las tasses militârs.
Lant daûr di Giovanni Zanier, las dôs ipotesis a podaressin jessi metudes adum disint che i Gjismans a erin in politiche nome intal Tresinte, e no ducj, midiant che a no si cjacare dai Gjismans das contrades di Sant Pieri intal Parlament.
I CJISCJEI INTA VAL DAL BûT
Inta valade da Bût, come in chês âtes, cualchi Gjisman al veve il so cjiscjel.
In bande di Seces (sôre Zui), lant daûr di ce ch’al dîs Tito Miotti, al ere un fortìn nasciût forsit in chê volte ch’al ere colât l’Imperi roman e fat sù da int di Zui.
C. G. Mor al dîs invezit che il fortìn al veve di essi stât fat da chei ch’a erin inta arimanie langobarde, che probabilmenti a ere a Seces e che dopo a ere diventade dai Gjismans.
Inta Etât di Mieç, Darte a veve un so cjiscjel (une sorte di cjase cui mûrs potents), ch’al ere forsi dongje dal simiteri di voi.
Di Manzano a nus à lasciât cualchi nutizie encje sui cjiscjelans. A nus conte di cuant che, intal 1307, Tumieç al domande ’as comunitâts da Cjargne di judâlu par obleâ i cjiscjelans a finîle cu las robaries ch’a erin intas strades, dulà ch’a freavin ’a int.
Tra i principâi delincuents autôrs di chestes robaries al è nomenât Enrico di Darte.
Cualchi an dopo Marsilio di Darte, dopo di jessi deventât citadin di Cividât, al à lasciât il cjiscjel a Corrado Ruggero di Verzendo di Darte.
Si pos pensâ che il cjiscjel al fôs stât dongje dal simiteri di voi parcè che, seconti Giovanni Gortani, a son stâts cjatâts vanzums dai mûrs, roube di metal e une monede dal patriarcje Beltram. Di Manzano al riferìs che intal 1221, i fradis Rico e Tomâs di Cjandùs a trasferirin il domini di mieze Val di Cussigian a Rico, sciôr dal cjiscjel di Sudri, ch’al ere là che voi a è la glesie di Ducj i Sants.
Chest cjiscjel al ere ben fuarteçât e protezût da tante vegjetassion.
Al sciere la Val da Bût il “Castrum Moscardum” (Cjiscjel Moscjart). Un document dal 1836 al dîs che inta gastaldie da Cjargne a erin dai cjiscjei: chel di Tumieç e chel dal Moscjart, ch’a dovevin jessi tignûts cont a speses dal gastalt. Il cjiscjel Moscjart, metût su pa strade ch’a va a Mont di Crous di Cjargne al veve il compit di difindi e di controlâ dute la Cjargne e il mercjât frecuentât da forescj e da cjargnei.
In cheste zone strategjiche il patriarcje Grivôr di Montlunc al fasè il so borc e ur concedè a chei ch’a fossin stabilîts alì une posizion di privilegjio, come a chei di Tumieç.
Dopo a vegnirin costruides tantes fortificazions dongje da Tor.
I centris principâi, metûts intune strete ch’à controlave e ch’a difindeve la Cjargne, a forin chel da Tor Moscjarde a difese da Val da Bût, chel di Vençon pal Tajament, chel di Scluse (Chiusaforte) pa Fele.
Par cure di Ilenia Flora e Michael Galassi
Da G. Zanier, Civiltà carnica, Ente Friuli nel Mondo
| ||
|
