Economie e marcjâts
Dopo dal Mil, l’economie a ere incjimò pouc svilupade, ma il cumierç al lave simpri plui crescint, favorît da posizion dal Friûl.
Tal 1258 a si è formât encje un mercjât a Tumieç, concedût da Grivôr da Montelongo, e cussì Tumieç al è deventât un tic a la volte il paîs plui important da Cjargne.
Las risorses in Cjargne a erin i pascions, ch’a permetevin la produzion di formadi e di vendi i vigjei ai forescj, e i boscs, dula ch’a vegnivin taiâts i arbui ch’a vegnivin mandâts a val fint al mâr cu la fluitazion.
L’agriculture in Cjargne a rindeve pouc e a ere limitade in terens piçui.
A produsevin blave, siale, vene e faves.
A erin encje gjaves di fier inta valade dal Dean.
Encje in Cjargne dopo dal Mil a ’nd è une floridure; in particolâr tra il Mil e il Miledoi l’economie a cres, la int a prodûs bens di consum, bens di lus, no nomo pa l’alimentazion. A ’nd è un aument demografic. Ch’al fos un ferment si lu capìs in particolâr da cualchi testament, ch’a vignivin fats intant dai mercjâts, dulà che a si vendeve e che a si comprave di dut e che a vignivin encja nodârs, par proponisi. A erin tancj mistîrs. I faris a produsevin i imprescj di fier, indispensabii in chel timp par ducj i lavôrs (in campagna, tai boscs…); a erin personaçs un pouc magjics, misteriôs, parcè ch’a lavoravin cul fûc. A ’nd ere artesans ch’a produsevin bens di lus: sartôrs, tessêrs, cjaliârs. Ju conoscìn propit parcè che ai comparìs come testemonis tai ats scrits dai nodârs. A vevin di jessi persones stimades e ben conosciudes parcè ch’a erin garants da veritât di ce ch’al vigniva regjistrât tal at.
Tai confronts dal patriarcje i Cjargnei a no vevin chei oblics fiscâi e militârs ch’a vevin chei âtis furlans.
A scuegnivin pastoreâ i tredis pas su las monts, a vevin di sigurâ che intas strades a si podès viazâ e a vevin di costruî puints là ch’a coventave.
Par cure di Alain Englaro e Francesco Piazza
Da G.C. Menis, Storia del Friuli, SFF; G. Ellero, Storia del Friuli, Ribis;
lezion dal Prof. Gilberto Dell’Oste