Nodârs e testaments
Ta Ete di Mieç, par fâ il nodâr a nol coventave il dotorât. I nodârs a fasevin las primes scueles in paîs, dulà che i mestris a erin i preidis. Prime a si imparave a lei; dopo, cui ch’al veve las capacitâts o cui ch’al vuleve e ch’al podeve, al imparave encje a scrivi. Po i aspirants nodârs a lavin tas scueles comunâls dai paîs plui grancj, dula ch’a imparavin il latin e il derit. Po a fasevin un garzonât in cjase di un nodâr. I fîs dai nodârs, encje s’a podevin fâlu in cjase, a lu fasevin fûr dal paîs. Finîts i studis, i nodârs a vevin di fâ un esam a Udin devant dal patriarcje e a cuatri nodârs impuartants e ben conosciûts. Cussì ur vigneve dât il permès di esercitâ cheste profession, permès ch’al vigneve dât da l’autoritât imperiâl o da l’autoritât apostoliche. In chest mût a si garantive che la persone a saveve fâ il so mistîr.
In chê volte a si scriveve par latin e la scriture a ere il “corsîf notarîl”, ch’al è un grum dificil da lei parceche al dopre cetantes scurtadures. In plui, stant che la puntegjature a no esisteve, al è plui dificil di rivâ adore di lei. La prime letare dal testament a ere simpri plene di ghirigoris. Dapît dal testament a si cjate simpri un simbul di riconosciment. Ogni nodâr al veve il so. Ogni nodâr al veve la sô pergamene, ch’a ere fate di piel di pioure o plui da râr di vigjel. A las cjatave dal cjaliâr.
L’ingjustri a lu faseve dabessôl: ogni nodâr al veve une tinte difarent, a variavin segont une particolâr ricete (a dopravin il “nero di seppia”, ma encje il cjalìn). A scancelavin cuntun trat di pene.
La persone ch’a vuleve fâ testament a faseve meti jù las sôs volontâts dal nodâr, ch’al tigneve cont su un sfoi di cjarte. Cuant ch’al tornave cjase al scriveve la biele copie suntun cuader, dopo al faseve plui copies e une a vignive tegnude tai archîfs parochiâi. I archîfs, però, a podevin jessi distruts da fûcs o roseâts das surîs, ch’as son un dai piês nemîs das pergamenes.
Se une persone no faseve testament, la sô ereditât a lave ai parints plui strets, s’a no ’nd ere, al lave dut a l’aste. Cui ch’al vuleve cambiâ il testament al faseve fâ un “codicillo” (une zonte al testament), s’a si fasevin plui testaments al valeve l’ultim.
Di solit la int a lasciave alc encje ’a Gleisie. Tal 1348, cuant ch’a e stade une grande pestilence in dute Europe, e encje in Cjargne, la int, ch’a veve poure di malâsi, a faseve dispès testament; difats, tai nostis archîfs parochiâi a son tignûts da cont cetancj testaments di chê ete.
Si veve ocasion di fâ testament encje ai marcjâts, dulà che il nodâr al rivave cul so banc, a disposizion di ducj chei ch’a vevin bisugne. Chest at al veve di jessi fat devant di dîsj testemonis (la grande part artesans), ch’a coventavin par garantî la validitât dal document.
Par cure di Klaudia Kolnrekaj e di Cinzia Selenati
Da lezion di Gilberto Dell’Oste