Las Pleifs
Cuant che l’imperi roman al è sdrumât, cun dute la sô struture, pal popul das campagnes la Gleisie a restà l’unic pont di riferiment salt e ben organizât, par dibot dut il prin milenari. Difats, intant das invasions dai popui gjermanics e slâfs, ch’a faserin mudâ duta l’organizazion politica, las comunitâts cristianes a restarin simpri compagnes.
No si sa trop das origjines das pleifs, parcè ch’a mancjin documents. Al è cetant probabil ch’a nol fos un disen precîs dal patriarcje davûr da lôr nascite; pluitost, al è di pensâ che grups di cristians das campagnes a si dessin dongje ator dai centris plui grancj, dulà ch’a rivavin (za dal III-IV secul) miscionaris e vangjelizadôrs e dulà che al veve di jessi di cuant in cuant cualchi preidi.
Cualchi studious al riconòs inta organizazion das diocesis-pleifs-capeles las olmes di chê che a ere stade la struture ministrative dal timp di Rome: municipium-pagus-vicus.
In pôc timp, tai centros grancj a forin fats sù lûcs pas messes e pa ministrazion dai sacraments (basiliches paleocristianes di Zui, di Divilin e di Luvinçes) e siguramenti a vignive organizade encje la cure das animes. Cheste nove organizazion a ere clamade PLEIF (dal latin plebs = popul) e a indicave la comunitât cristiane das campagnes e la sô struture: las persones, il teritori e las ativitâts pastorâls ch’a si fasevin.
Inte Ete di Mieç la pleif a ere une unitât teritoriâl da diocesi aquileiês, ch’a cjapave denti paîs, prâts, cjamps e boscs. Sun chest teritori il plevan (il preidi ch’al ere il titolâr da pleif) al veve un ciert control e al veve il derit di fâsi paiâ las tasses (la decime — la decime part di ce ch’al vignive coltivât e dal arlevament - e il cuartês — la cuarte parte da decime).
La pleif a ere encje une unitât juridiche dulà che il plevan al veve la jurisdizion gleseastiche sun dutes las vile, ch’al vûl dî ch’al veve il compit di fâ conosci e di rispetâ las normes da Gleisie. Dispès il plevan al veve encje autoritât sun cualchi cuistion leade al derit civîl.
La pleif a ere soredut une unitât pastorâl, un pôc chel ch’a è vuei la parochie, cuntun unic font batesimâl, un sôl cimiteri in bande de marigleisie, un sôl pulpit pas predicjes e un sôl preidi pa confescion e la penitinçe: pe Messe da domenie, pal funerâl, pal batisim, la cresime e la confescion i cristians das valades a vevin di lâ ta pleif. Incjimò in dì di voi tai paîs da Cjargne a si cjatin vecjus ch’a si impensin di vêi sintût a contâ di cuant che «une volte ducj i muarts a si puartavin a San Pieri». Encje las noces, par vêi valôr a vevin di essi riconosciudes e regjistrades dal plevan.
La Pleif a no ere l'uniche gleisie intal teritori da sô jurisdizion, ma las viles plui grandes o chês plui lontanes a podevin vei une capele, dulà che il plavan al mandave i siei jutoris (capelans) par fâ, tai meis plui freits, la Mese da domenie e la dutrine.
tra l'XI e il XII secul las pleifs da diocesi di Aquilee a son metudes dongje par zone ogni zone a è clamade Arcidiaconât.
Las pleifs a no son nassudes dutes insieme, ma une a la volte, daûr da bisugne une capele a podeve utignî di vei il batisteri e il simiteri e diventâ cussì une pleif. Un document dal XII secul al dîs che in Friûl in chê volte a'nd ere 102 pleifs e di chestes 11 intal Arcidiaconât di Zui
Par cure di Alessia Quaglia e Thomas Selenati
Da G. Burba, Rivista diocesana udinese, n. 6, 1997