|
La Pleif mari di Zui
|
|
SANT PIERI DI CJARGNE
La catedrâl di Sant Pieri a è la gleisie “mari” da Cjargne; poiade in som da mont, a cjale jù dut il cjanâl da Bût.
STORIE DI ZUI E DA SÔ PLEIF
Zui a è la vecje Julium Carnicum, citât romane fondade cualchi decine di agns devant di Crist, par tignî di vouli la vie di Mont di Crous.
A no ‘nd è testemoneances su cemût che la buine nove di Crist a seti rivade fint achì, a Julium Carnicum e intal teritori aventi atôr, ma al è cetant probabil ch’al seti capitât ungrum adore: a Zui, difats, a son stâts cjatâts fûr i rescj di dôs basiliches paleocristianes. La plui antighe di lôr (da segonde metât dal IV sec.) a veve bielzà un batisteri e in bande al ere un simiteri: duncje a veve di essi une pleif e, se in chest timp a ere zà une pleif, al vûl dî che la comunitât cristiane da zone a veve di essi pluitost grandute.
I storics a pensin che Zui al podi essi stât sede vescovîl bielzà viers la fin dal IV sec., encje se il prim vescul ch’i savin il so non al è Ienuarius, muart intal 490.
Intal V secul, oramai l’imperi di Rome al ere lât al mancul e, cuantche a rivavin jù da Mont di Crous i soldâts invasôrs, ch’a robavin, a copavin e a brusavin dut, i abitants di Zui a scjampavin su pa mont di Sant Pieri.
Achì, probabilmenti, a e stade fate sù une basiliche plui piçule (parcé che evidentementi la int a veve di essi ungrum di mancul), dulà ch’a ere la sede dal vescul.
La plantute di chest prin edifici altomedievâl a è stade identificade cui ultims lavôrs di ristaur e si la pò cjalâ in dì di voi sul palment da gleisie, parcé che la an segnade cuntune lamine di oton.
In chel timp di invasions, però, i vescui a àn di vêi vût miôr di ritirâsi in puescj plui cuiets e sigûrs, come Cividât e Grau; cussì, fint dal 737 a no forin plui nomenâts vescui pa diocesi di Sant Pieri.
Achì al fo lasciât però un delegât dal patriarcje di Aquilee, il prevost(1), che, judât da vot cjalunis(2), al veve di proiodi a cure pastorâl dai cristians restâts ta valade e a ministrazion dai bens da Gleisie locâl.
Il teritori da iurisdizion di Sant Pieri al ere cetant grant e nol ere facil spuestâsi di un lûc a chel âti, siché, bielzà dal V secul, al veve di essi inviât chel procès di fondazion di noves pleifs, ch’al puartarà cul lâ dal timp a nascite das parochies.
LA VITE TA PLEIF DI SANT PIERI
Inta pleif di Sant Pieri a vivevint il prevost e i cjalunis, ch’a formavin un cjapitul(3) e ch’a vevin in consegne e a tignivin dacont il Sant Sacrament, il Crisme e il Vueli Sant par ch’a no vignissino roubâts.
Pous a son i documents ch’a nus cjacarin dai prins secui di vite da pleif di Sant Pieri.
Segonti l’opinion dal storic Pio Paschini, il grup dai plevans, dai diacui e dai cjalunis, ch’a judavin il vescul di Zui, a àn di essi restâts achì, cuantche lui al si è scindilât, intal 718, e intal so puest al à di essi stât metût un prevost.
Intun document dal 1169, il prevost di Sant Pieri al è clamât arcidiacul da Cjargne: duncje al à podeis e une autoritât ch’a son pouc di mancul di chei di un vescul.
Fint al 1290 il prevost e i cjalunis a erin a stâ aventi da gleisie di Sant Pieri (di chescj edificis a son stâts cjatâts fûr i mûrs dal contôr) e a fasevin une vite di comunitât: a preavin, a fasevin las funzions e a mangjavin la sere ducj insieme; invezit vie pal dì a lavin atôr pas valades e i paîs par istruî i cristians, in maniere ch’ai rivas pronts pa messe da domenie, che si la celebrave nome inte pleif. Vie pe setemane, doi cjalunis a vevin di garantî la lôr presince inte pleif, mentre che la domenie e chês âtes fiestes a vevin di essi ducj presints.
Inte pleif, in plui da celebrazion da messe da domenie, a si ministravin ducj i sacraments e a si fasevin i funerâi: il font batisimâl e il simiteri a erin difats nome inte gleisie plebanâl. Achì si tiravin encje dongje i tribûts.
Il prevost, jessint encje arcidiacul da Cjargne, al tignive un tribunâl, al vigilave sul clero ch’al ere sot di lui e al veve un so vice ch’al cjapave il so puest cuantch’al ere vie.
(1) Prevost: rappresentant di un podei ch’al sta parsore, metût a capo di funzionaris o servizis ch’a durin par un cert timp.
(2) Cjalunis: segnâts intal canone di chê gleisie, ch’a à par chest il dovei di mantignîju.
(3) Cjapitul: comunitât di presbiters e diacui ch’a àn une regule o un statût e che fra di lôr a sielzin un capo. Il cjapitul di Sant Pieri, diversamenti di chei âtis, al veve encje il podei di ministrâ i bens dal teritori e di fâ une ativitât di tipo juridic, propit come un vescul. Chest al è sucedût probabilmenti parcé che, cuantche il vescul di Zui al è lât vie, la diocesi no è stade eliminade dal dut, ma al è stât un passaç graduâl a une forme organizade ch’a ere a mieze vie fra la diocesi e la pleif, dulà che il clero al à di vei mantignût dibot ducj i vantaçs che a si podevin cjatâ intune diocesi.
Par cure di Elisabetta Dorissa e Vanessa Flospergher
Da M. Marra, San Pietro in Carnia, Comune di Zuglio
|
 |